முதல் பக்கம்

வழுத்தூர்.காம

எங்களுக்கு எழுத..

அல்லாஹ்வின் விருந்தாளிகளே!

(கவிஞர். வழுத்தூர் ஒளியேந்தி)

அல்லாஹ்வின் விருந்தாளிகளே!

அஸ்ஸலாமு அலைக்கும்

கொடுத்து வைத்தவர்களே

குதூகலமாய் போய் வாருங்கள்!

 

*

உங்கள் ஆன்மாவுக்கு சமிக்ஞை....

ஐயாயிரம் ஆண்டுகளுக்கு முன்

கஅபாவை கட்டி முடித்த கையோடு

கலீலுல்லாஹ் இப்ராஹிம் நபிகளின்

பாங்கோசை அப்போதே கொடுக்கப்பட்டது

 

*

இப்போது விருந்தாளிப் பட்டயம்

விநியோகிக்கப்படுகிறது

 

*

"லப்பைக் அல்லாஹும்ம லெப்பைக்"

'இதோ ஆஜராகி விட்டேன்' என்று

உடலை மட்டும் ஆஜர்ப்படுத்தி விட்டு

உள்ளத்தை உங்கள் ஊரிலல்லவா

உலவ விட்டு வந்துள்ளீர்கள்!

 

*

அனைத்துலக அதிபதி முன்

அடக்கமுள்ள அடிமையின் பண்பு

'இஹ்ராம்' ஆடையில் இருப்பதேயாம்!

பக்கிரி கோலத்தைப் பறைசாற்ற

பண்டார கோலத்துக்கு உரைசாற்ற

இஹ்ராம் உடையே ஏற்றது!

மற்றதெல்லாம் இதன்முன் தோற்றது!

 

*

விரும்பிழைத்தவன் உங்களை

வெறுங்கையோடவா அனுப்புவான்?....

நம்பிக்கையோடு நடை போடுங்கள்!

தூய்மையை எண்பிக்கும் செயல் பேணுங்கள்!

ஹரம் ஷரீபை வலம் வருவதும்

வாய் மணக்க தஸ்பீஹை

உயிர் கலந்து ஓதுவதும்

உள்ளச்சத்தோடு தொழுவதும்

எழுவதும்தான் உங்கள் வேலை!

 

*

நிரந்தர நோயாளிக்கு

எந்த வைத்தியன் பிரியாணி கொடுக்கிறான்?....

 

*

உணவுக் கட்டுப்பாடும் உள்ளக் கட்டுப்பாடும்

ஒருங்கிணைந்தால்தான்

சொஸ்தம் சீக்கிரம் கிடைக்கும்!

 

*

பாவமூட்டை சுமந்தவர்கள்

பத்தியமாயிருந்தால்தானே

பலன் கிடைக்கும்!எனவே புலன் அடக்கும்!....

லட்சக்கணக்கில் செலவழித்தது

இறையில்லத்தைக் காணவா?....

வாய் ருசிக்கும் உணவைப் பேணவா?

விட்டுத்தொலையுங்கள் உங்கள் வீண் அவா!

 

*

அடக்கியாளும் மன்னவன் முன்கூட

அடக்கமாய் நடக்க முடியாதா?

இடக்கு செய்யும் இப்லீஸுக்கு

கல்லெறியத் தானே கடல்தாண்டி வந்தீர்கள்?

கஅபா, ஸபா, மர்வா, மினா, முஜ'தலிஃபா

அரபாத் இடங்களெல்லாம் உங்களைப்

பரிசுத்தப் படுத்தும் களங்கள்!

தூய்மை விளையும் நிலங்கள்!

தேடிப் பெற்றுக்கொளவீர் நலங்கள்!

 

*

ஜம் ஜம் அமுத நீர்

தாகத்துக்கு மட்டுமல்ல.....

நல்லெண்ண விதைகள் முளைக்கச் செய்யும்

நபிவழி மருத்துவ நீர்!

 

*

தவ்பா செய்வதும் மனநிறைவாக

தர்மம் செய்வதும்

அன்றாடக் கடமைகளில்

ஒன்றாக்கிக் கொள்ளுங்கள்.

 

*

அரபாத் பெருவெளியில் தங்குதல்மூலம்

அல்லாஹ்வின் கருணை பொங்கட்டும்!

 

*

மதினா செல்லுமுன்....

மரியாதைக்கு பொருள் என்னவென்று

புரிந்து கொள்ளுங்கள்!

நீங்கள் காணப் போவது....

நபிகள் (ஸல்) கல்லறையல்ல அது!

தோற்றம் அப்படி யிருக்கலாம்.....

 

*

வாய் மணக்கச் சொல்லும் சலாத்துக்கு

சுடச்சுட

உயிர் மணக்க பதில் தரப்படுகிறது....

 

*

கல்லறை பதில் சொல்லுமா....

ஏமாற்றத்துக்கு இடஙகொடுக்காதீர்கள்!

 

*

உயிர் மூலத்தோடு உரையாடும் பாக்கியம்

காருண்யரின் கடைக்கண் பார்வை

எல்லாருக்கும் கிடைக்கட்டும்!

 

*

அனைத்துலக முஸ்லிம்களின்

அன்பின் சலாத்தை

அடக்கமாக, அமைதியாகக் கூறுங்கள்!

பதில் நிச்சயம் கிடைக்கும்!

பரவச நிலை உயிரில் கலக்கும்!

 

*

மோட்சம் தரும் சலவாத்தை

முழங்குங்கள்! அங்கு தங்கும்

எட்டுநாள் உறவில்தான்

ஈருகை நன்மை ஒளிர்விடும்

உண்மை உணர்வீர்கள்!

 

*

சலாமத்தோடு திரும்பிவாருங்கள்!

மனிதப் புனிதராய்!

மதிப்பிற்குரிய ஹாஜியாய்!

 

*